EQUIPU CREATIVU

L’arte de facer cerveza… con ARTE

Blanca Fresno

Responsable de producción

Blanca Fresno, la nuesa responsable de producción, -especialista en elaboración de Cerveza y Microcervecería por la Universidad de Alicante-, diseña y tresna les recetes: «En 2008 visité un brewpub eslovacu y pidí una xarra de lager. Nun prebare enxamás daqué asemeyao y dende entós el mio conceptu d’esta bebida camudó pa siempre, tanto, que dende aquel momentu la mio vida ta venceyada a la cerveza de forma cuasi esclusiva». La otra pasión de so ye l’enseñu, que la llevare tiempu primero a facer estudios universitarios rellacionaos con ello.

En 2012 entamó a producir la cerveza ORDUM nel Cá Beleño. Dende l’empiezu siempre lleó a los maestros de mayor prestixu, como Boris de Mesones, que pente medies de la rede comparte les sos conocencies, faciendo muncho menos abegosu’l camín a les persones que siguen los sos pasos de la qu’entamen nesti mundu.

«Ye una suerte bien grande conocer les sos esperiencies y lleer los sos conseyos. Ye dalgo polo qu’hai que tar agradecíes, les qu’ellaboramos y les que tomen la nuesa cerveza, yá que toes eses conocencies tresmitíes inflúin nel productu final ensin dulda nenguna».

¿Cómo ser quien a iguar una cerveza calidable? «Lo meyor ye alcontrar el to métodu a base de munchu trabayu, munchos años d’ensayu y error y de tener en consideranza tolos estudios qu’otres persones fixeron. La clave ta en caltener l’enfotu y esfrutar del to trabayu».

Frank Delgado, –especialista en elaboración de Cerveza por la Universidad de Alicante-, el nuesu director, ye’l que dirixe y planifica qué facemos, ye’l motor creativu. Venceyáu dende neñu a la música, túvolo presente siempre na so vida profesional, siendo unu de los fundadores del grupu folk Beleño, nel que foi violinista y percusionista.

Amás de tar al mandu del Cá Beleño, foi productor musical tanto n’España como n’Hungría, onde tuvo cuatro años y onde vivió en primer persona la cultura cervecera típica de Centroeuropa. «Aquella esperiencia dexóme conocer un modelu de negociu poco avezáu nel nuesu país va unos años y foi entós cuando surdió la idea de convertir el Cá Beleño nun brewpub».

Nestos años, creó y produxo festivales naúticos como Noegápolis dientro del Arcu Atlánticu, en 2012, en Xixón, siendo quien a xuntar la so afición pola mar y la música y onde participaron figures musicales como la banda asturiana Nuberu o’l renomáu gaiteru Paddy Keenan. Dos años primero tamién participó na organización del Alcuentru Cerveces del Mundu, un festival fechu en Xixón (2010), onde los protagonistes yeren la música y la cerveza, consiguiendo ser un gran éxitu.

Especialidaes deportives como la esgrima que, siempre que pue, inxerta nos eventos qu’ORDUM entama, son otres de les sos aficiones.

Frank Delgado

Gerente y Director Creativu

Una pinta d’historia

La cerveza ye una bebida milenario con un orixe desconocíu. Faciendo falta como fai un procesu previu pa que’l zucre tea disponible nel granu pa la so lleldadura, paez difícil pensar que la so creación fuere daqué casual. Supónse que’l so orixe y usu espardíu entamó ente’l 6.000 y el 8.000 e.C.

Nel Antiguu Exiptu, Babilonia y nes demás cultures del bronce européu, sobre manera la celta, la muyer tenía un papel fundamental na fechura de la cerveza porque se-y atribúi gran parte del trabayu a facer, hasta de la intervención de los monesterios como modelu de negociu.


La muyer tenía un papel fundamental na fechura de la cerveza



N’España, gracies a Carlos V, la industria cervecera, hasta entós minoritaria, garró puxu


N’España, gracies a Carlos V, el nietu de los Reis Católicos Xuana de Castiella y Felipe’l Fermosu, dióse-y puxu a la industria cervecera, hasta entós minoritaria. El buque insinia danés nel que venía, l’Engelen, columbró per primera vegada El Sueve, llugar de referencia de tolos navegantes nel Cantábricu, llugar onde ta la fonte de Boriñes, y dempués d’arribar a una milla y media de Villaviciosa desembarcó nel cai de Tazones. Unu de los buques taba enllén de cerveza ale británico por mor d’un problema cola producción de Flandes, motivu del retrasu de la flota. Carlos, entovía Carlos V, trai con elli a los sos propios maestros cerveceros de Malines, ya instala en Madrid la primer fábrica de cerveza onde se fai esta bebida pa él y pa la so corte. Yera talu’l so apegu por esta bebida que cuando cola pa Cáceres, dempués de la so abdicación, manda instalar otra fábrica ellí, nel Monesteriu de Yuste.